'A túa voz', un poema de Moncha Prieto

Moncha Prieto

A locutora e escritora galega Moncha Prieto, envíanos para celebrar o Día Internacional da Poesía, o poema titulado ‘A túa voz’.

A TÚA VOZ

(Barcelona, 1987)

A túa voz

vagalume senlleiro

de noites alienadas

que dormen na preguiza

cómoda da ignorancia.

Marusía que axita

horizontes estáticos

das gaivotas que un día

venderon as súas alas

e trocaron os soños

por falsas lambetadas.

A túa voz

crítica, coma a dun mestre

refugando ignorancias.

Agarimosa

coma unha nai que arrola

ó seu meniño… e canta.

Constante

coma a man do amigo

que sempre nos agarda.

Doce

mesmo coma as palabras

que só din os amantes.

A túa voz

camiño de ningures

dun quizais pendurada.

Coroada de envexas,

odiada e desexada.

A túa voz

arrecendendo a utópica

chantada no desexo

dunha meta soñada.

A túa voz,

amigo,

é a vida que pasa.

 

Moncha Prieto

Escritora e locutora galega, para quen escribir é unha terapia imprecindible. Crear, según pensa, é xogar a ser Deus. Nos personaxes escóndese, as veces, todo un mundo intrínseco que non podería expresar doutro xeito.